قصيدة مشتركة: الطاهر بلخيري / محمد بهناس

الشاعران بهناس محمد وبلخيري الطاهر بن محفوظ، أولاد نايل، الشعر الملحون، Djelfa, Ouled Nail

يا حـــوض الفڨـار والماجن لخضر *** عيـد عليا ويــن سكّــانك غـــابو
عربانك تحت الثّرى ولّا ع الــبـــر *** حيّين وهجّو من الوطــن وســابو
لامــن عــاد الــيــوم فيــنا يتــفــكر *** وهان الواجي يتنسى بين احبابــو
وامّا انا في القـلب مسكنهم عـــامـر *** لهل الحب مشـرّعة طول ابوابـو
يا بن خالي كاشما عارف شــــاعر *** يرثينــي كمــا النـاس اللي غـــابو
من ڨـــــدّام اللا المنيّـــــة تحـــضر *** يبكي الحي اللّي رشا فوق تــرابو
ولو كـــان العـين مـــزالت تخـــزر *** زهوي ردّى والعمر ضاع شـبابو
قلبي مــــل الفـــانية لا با يعشــــــر *** غير القبـــر يجول ما بين اهـذابو
يا ولفـــي دونك ڨطــــاطيع تحيــــر *** بر على نــــــوبة تضامي قــوّابو
مهمــــودة بالعيــــن تڨـــرب وتوخّر *** يتـــــودّر فيها المـيّاز احســــابو
شــــوفة مــــاها قا على الكيفان تڨر *** للملهــوف يلــوح ع البعد سرابــو
مڨطـــوع وقلبي من الشـوق تفطّــــر *** محمـومة ومفسّخة قاع اجـــنابو
ڨابلت المڨطـــــــاع دفـــــلاه تشـــبر *** كاف الحيرش غــانسة ليه ادرابو
ريح هــــواهم ع التّڨـــــى عاد يخبّر *** يزهى ڨـــلبي كي يڨــرّب طـلّابو
منها بهـــزة ضلعة الخنڨــــة والجــر *** ويا سعدي وكر المهى بان صوابو
قرّبنا من تسعــد الخـــاطر وتســــر *** موطنــها راني توحّشت اصحـابو
متوحش ذاك السمـــاط وحجر البر *** ومتــــوحش ڨــوران حتى بترابــو
الحمــــــد لربي بعد عســرة تتيـسّر *** نصفاهم والقلب يرجع لصـــــوابو
الشاعران بهناس محمد وبلخيري الطاهر بن محفوظ، أولاد نايل، الشعر الملحون، Djelfa, Ouled Nail

الشاعران بهناس محمد (يمين) وبلخيري الطاهر بن سعد (يسار)، الجلفة، مسعد، حاسي بحبح، أولاد نايل، الشعر الملحون، Djelfa, Ouled Nail

 26 المشاهدات,  1 شوهد اليوم

الوسوم:, ,

اترك تعليقاً

لن يتم نشر عنوان بريدك الإلكتروني.