بهناس محمد/ قصيدة “نكْمـي في القـهـوة نبات نحبّـر”

بهناس محمد، الشعر الشعبي، الجلفة، أولاد نايل، الرثاء، Ouled Nail, Djelfa

بهناس محمد

نكمـي في القـهـوة نبات نحبّـر *** مهموم ونومي جفيت وسـادو

يا شيبي ع الولف واش يصبّر *** والفــرڨـة وايّــامها يســوادو

نجــع المحبّيـــن قـادي يظـهر *** عند النــاس اخبارهم يتـعـادو

ع البكرة ڨــالو صحيح يشـوّر *** ويخمّـل مرحــولهم وعـتــادو

عنهم ڨاع الناس راهــا تهــدر *** غير الڨلب بكيم وسط فــوداو

قاشيهم ذ العـام لا بـا يعــــشر *** ما حنّتـش عبـــادهم لعبــــادو

يقــــدى كــودة برهم يتـوخّــر *** وتــولي جَـــوبة عليـك بلادو

عينك مڨطــــوعة تعـود ادّور *** بكراعك تمشي جميع صمادو

كانش معلم في التڨى تستخبر *** هامــل ودروب الرفـاڨة كادو

شوفة من لحباب شاهي تنظر *** غير شهيــلي يلفحك بصهادو

مقبــوب وظامي البر ومڨفـر *** وبعيـنك جـــربة وكحل حمادو

ڨطّــــاعة فيها العلب محــدبر *** نيبـــانو تحفي الخيـــل فـرادو

وعراڨيب من الثيـــاب تصفّر *** شحبت ڨـاع وجوهها وسوادو

هذا الوعـر صحيح عنّك مڨدر *** ماكش ڨمنـــة للبــلا وانكـادو

يا ظيمك في الشّاو كنت مخيّر *** وايّامك في العز جملة جادو

قادي شاحب والبـدن متعــقّـر *** حالك هـــالك والقبـــر ميعادو

مهـــزوم ولا حـد عنك ينعــر *** لا شاعر يرثيك جاب انشـادو*

 جينــاكم باللـه واش يصبّــر؟ *** معڨول وناس المحبّـــة حادو

الوحش هزمني كلّ يوم يجوّر *** ليعـاتو في الڨـلـب ياسـر زادو

خلّـــوني في بــرّهم نتفـــكّــر *** عزّوني ذ القلـب سكن الحادو

يا بويــا مهبـــول عدت مودّر *** واللّي ضــبّــع ما تلـوم عبــادو!

 26 المشاهدات,  1 شوهد اليوم

الوسوم:, ,

اترك تعليقاً

لن يتم نشر عنوان بريدك الإلكتروني.