بقلم الشاعر قدوري أبو الوليد/ رثائية الحاج عبد الرحمان حنيشي رحمه الله

الحاج دحمان حنيشي، زنينة، الإدريسية، الجلفة، شعر الرثاء، الشعر الشعبي الملحون، التراث العربي الهلالي الإدريسي، Ouled Nail, Djelfa

عدة خلوفي

في رثاء “النهر الدّفاق” الحاج حنيشي عبد الرحمان “دحمان”، علم أعلام زنينة … القصيدة صنعها الشاعر الفحل قدوري أبو الوليد بعيد وفاته ببضعة أيام ( 13 من نوفمبر 2019 ) …
ضاڨت روحــي كـي نتايا يا علال(1) *** وتفكــرت وطاح ڨـــولي بغيامو
عييت نجاهد بالصبر ثڨلت لحمال *** سحاب مكـدر حـام عني بظلامو
بدر تمسّـى غــاب عنا . يسوال *** بعـدن شعشع، صد وڨضاو أيامو
يااا محمد(2) كاش مـــا باقي دلال *** ســال حميدة(3) كان فادك بكلامو
ڨلــو خبر الحاج هوّض لي لعلال *** وادعنا زين المـــلامح تبســامو
لكريم اللي كان بالخبــزة وكال *** بيوت المحرومين كي ڨفى صاموا
تشهدلو بالخيــر لقـــوال ولفعال *** مولى علم ودين ومتين حـــزامو
مڨصــد للمظلـــوم وذراع الذلال *** في يوم الحـــزة يزهيك حسامو
وامثالو في وقتنا محسوب ڨلال *** راجل مولى ميز وحلال اطعامو
مولى كلمة ميش ڨولة ڨال وڨال *** ما يتحـدث قايلا ڨص كـــلامو
والرجلة والنيف ثاني فيه خصال *** وارث ذ الميزات من صيل اعمامو
واذا كان شكـــرت لك معدن لخـوال *** غالي ما تتعد بالمـــال اســوامو
ولد البية في عروڨو واش تسال *** ڨاع أوصــافي ما يوفوش امقامو
عزّوني فاللي تمسّى شاو الحــال *** خلّى فهڨ كبير وخـلات ارســامو
قصر زنينة حازنة نســوة ورجــال *** سبحان اللي راه يحكم باحكامـو
كلمة ربي يرحمـو زينة ف الفــــال *** لكـن تجـرح كي تلحــڨ لرحــامو
ف الفـــردوس مــع الصـاحبة والآل *** روحو تسكـــن كي تفارڨ لعظامو
يا دحمان ان شاء الله أحسن مآل *** في جنة رضوان بجــوار مقــــامو
في حضن الرسـول تتنعم بدلال *** يتــلاڨاك الهيه تفــرح بسلامو
قدّوري مـن جاب ذ الكــلمات وڨال *** يرثي فالمــرحوم يشكي بسقامو
ومن غيـر الله ما شكيت انا مُحال *** واللي هــــربوا ليه ذو ما يتــلامو
(1، 2، 3): أبناء الحاج عبد الرحمان حنيشي، حفظهم الله
بقلم: أبو الوليد قدوري
تصوير: سرطوط مراد
الحاج دحمان حنيشي، زنينة، الإدريسي، الجلفة، شعر الرثاء، الشعر الشعبي الملحون، التراث العربي الهلالي الإدريسي، Ouled Nail, Djelfa

الحاج دحمان حنيشي، زنينة، الإدريسي، الجلفة، شعر الرثاء، الشعر الشعبي الملحون، التراث العربي الهلالي الإدريسي، Ouled Nail, Djelfa

 37 المشاهدات,  1 شوهد اليوم

الوسوم:, ,

اترك تعليقاً

لن يتم نشر عنوان بريدك الإلكتروني.