قصيدة/ الدنيا نعطيك عنها خمس امثال

الشاعر الشاب/ سليخ بن عزوز

الدنيا نعطيك عنها خمس امثال *** واجعلهم ديما نصايح في بالك

اسّمسك بالدين تربح كل اعمال *** اليوم او قدوة الدنيا تجّالك

وتمسّك بالصبر وتوسع فالبال *** مكتوبك تصفاه ولّا يصفالك

الڨلڨة ما شبعت فقير بمال *** والصابر ما مات بالجوع ڨبالك

رزقك ياتي ليك ما فيهش تبدال *** واجلك ما يتحد نِـ يبان هلالك

اصدق بالصح والصحيحة للرجال *** والثيقة بيها الرتبة تعلالك

والصح يربي الكبدة للذلال *** والكاذب مخذول فيسع ينسالك

الصحي للناس يبقى شقل الفال *** والسفالي عشرتو ما تحلالك

ونوصّيك على حكاية ڨال وڨال *** هدرة دون العين مولاها شارك

وتحدث بالكاينة لا كان سوال *** واللي صاب الصمت يسمّى سالك

الزور بوَزنو قلب وزن الجِبال *** والحڨرة تعيى تفوخ وتڨضالك

والخدعة في لصل للكلب الختال *** في الآية مولاك ما حللها لك 

والرابع نوصيك صيّل من لبطال *** بنت الرادي قيلها ما شلالك

ما يغنيكش لونها لو كان غزال *** حين تشوف افعالها ما تسوالك

والنسواني ما يجي لولادك خال *** باللّي فيه ثرايتك يجبدها لك

عوز الوالي ما تروجل بالتدلال *** واللي ڨاصف ما اطوال بتكسالك

والشطر الاخير تربية لطفال *** أدّبهم باه العڨوبة تجّالك

ربيهم في طاعتك من شاو الحال *** وعلى ڨرب الجار ربّيه عيالك

واذا قلت انا نخليهم همال *** يطوالو ليام وتولي شابك 

انت تبقى عندهم مثل الخيال *** واللي يعلى ما يولّي يهوالك

(الشاعر الشاب سليخ بن عزوز، بلدية سد رحال، ولاية الجلفة، توثيق وتحرير نص القصيدة: بلخيري الطاهر بن سعد)

 103 المشاهدات,  1 شوهد اليوم

الوسوم:, , ,

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *