بهناس محمد/ فـراقْ الوُلْــف يْهمّـل العبد يـردّي

بهناس محمد، الشعر الشعبي، الجلفة، أولاد نايل، الرثاء، Ouled Nail, Djelfa

بهناس محمد

راني في لبعــاد مڨـطـوعـــة كبـــدي *** حازوني من عمّــة الناس تحــدّيت

بر اللاّ عنّـــو حكـى سـابــق جـــدّي *** لا بـــويا في ذ الحمايد ڨال مشيــت

في طرف الصحـرا معاشر كركودي *** ما نلڨى غير الصّمــد بيـه تعــزّيت

صمد مكيكــــح والعيــــا عنّو بـــادي *** زيّـــو مل من الحيــاة اللّي مليـــت

ولاّلي في ذ الصّحــاري مقصـــودي *** غيــر انا ويـاه بالــهــــم تكّــويـــت

كل مســا وصباح نقرالو نشــــــدي *** ونـحـــاكيه على الحبيب وما خلّيــت

شـــوف القدرة يفهم الصمّي قصــدي *** ويتقلّــق عني اذان عليه بطيـــــت

وحيــن ان والفني وسميتو صمـــدي *** خفت عليه فراقنــــا لا كان قديــت

يا عيـسى هم البّــــــــلا ولاّ سيـــدي *** راني عبد وعاد جـــلّادي ورضيت

أنت في حكم الهــوى راك تعــــدّي *** جـــوّر عنّك بالمــحبّـــة من حـــبّيت

فراق الولـــف يهمّل العبــــد يـردّي *** وينــــاه اللي فارق وقـــال تهنّيـت؟

على خاطر بحر الهوى غامق يــدّي *** ماني لايم في المحبة كان هـــويــت

كل لاخر في محنــــة هواه يشــادي *** غيــر انا راني على خويـــا قـنّيــت

البدر اللّـي في السمـــا لابــا يڨــدي *** ومالي رغبة في النجــــوم ولا حنّيـت

توحّشــت اللي كان في الجيرة حدّي *** ستري كان قبيــــل ضافي وتعرّيــت

نتفكّــر في ســالف الــدنيــا عهـــدي *** واللّـي رشّــاني فراقــو وتهسّيــــت

منو شــابت محنـتي وقــوا صهــدي *** وضحى جلدي ع العظم يابس وطويت

تلـــقـاني ونـجيــك وتظـــل تنـــادي *** ما تخـــزر ما تسمـــع اللّي هو ناديت

تلڨى غير خيـــال متلـــمّــد جلـــدي *** شوف القدرة حــي في الدنيا وفنيـت !

بكّانـي غيم ان مشــى تــــول بلادي *** ونقلّو: يا ذ الغمــــام علاه مشيــــت؟

انت درت النــار في وســط فــوادي *** ما تدري في ذ الفريسة واش ڨــديت

نتمنى راني نطيـــر على وعــــدي *** ويــــن تعـــلّي يا غمام معاك عليـــت

تتلفّت عينــــــي ويكثر تنهــــــادي *** وكفافي طيّبتهـــم من حيـــن نجيــت

نتفكّر ذيك المراســم في بُعــــدي *** والنـــاس اللّـي حبّهــم بيــه تكــــوّيت

نتقـــمّط في ذ الحـمـــاد على كبدي *** حســراه على وين عشّــاو وعشّـــيت

عشّـــيت براسي نهـــــوم وانـــادي *** لامـــن رد وجابنـــا وعـــلاه لقيـــت

بكّــيــت الصمــي بهـــمي يا ولـدي *** ما نتعــار على الحبيـــب اذا غنيــــت

اللّـــي رشّــــاني ووراني لحــــدي *** يا مسمـــط هذا العمر لا كــان حييــت

يابـــس لقبي والصّمـــايم في جلــدي *** مقبــــوبة هــذي العـــراڨيـب وقبّيـت

في قطّاعة خاليـــة حاطــم ســـدّي *** غير شهيلي والقوايـــل واش جنيــت؟

وراني خايـف من فراقك يا صمـدي *** ونـــولي ثانـــــي نغني لاه مشيــت !

يا عيسى غيـم الهــوا بان مســــدّي *** وعلى طـــرف بلادنا شفتــــو وبكيت

وعلى طــــرف بلادنا شفتــــو وبكيت!

 120 المشاهدات,  1 شوهد اليوم

الوسوم:, ,

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *